Horseshoe Bend

---

Wieder eimol meh hän mir müesse drum kämpfe, as mir am Morge öbbis z'Esse becho hän...
Drfür hän mir uns nochane dr Luxus gönnt, unseri Wösch inere Laundry zum Wäsche z'geh (12 Dollar inkl. Trockne und Zämmelegge und das innerhalb vo 3h - super Sach!). Denn sin mir uns do am Flughafe nomol go informiere über e Heliflug, aber do sie vo Page us nid zum Grand Canyon fliege und au nid zur Rainbow Bridge, het dr Christian das Projekt jetzt bis in Las Vegas verschobe.
Dank em guete WLAN bim Flughafe, hän mir am Nonno grad no es Geburtsdagsständeli via Face Time könne singe und hän do drby ganz viel Familiemitglieder gseh und ghört! Toll, die Technik!!
Und denn sin mir Richtig Horseshoe Bend. Leider het uns dört niemert's gseit (oder mir händ's nid checkt!), as es ca. 2km zum Laufe isch und das in ere Hitz vo über 40 Grad und berguf und -ab über Sand... So sin mir loszottlet - ohni Wasser, aber immerhin mit eme Huet uf em Kopf...
Bis dört ane hän mir's guet gschafft und dr Usblick isch eifach fantastisch gsi!! Dr Colorado River macht dört e 270 Grad Kurve - gewaltig!! Aber me muess immer schurig ufpasse, as me nid en Schritt in die falschi Richtig macht, denn es goht eifach senkrecht abe.
Nach dr obligatorische Fotisession sin mir wieder losmarschiert und dr Papi vo dr Felicia isch zum Glück so lieb gsi, sie uf de Schultere zrugg z'trage! S'Mami vo däm Kind isch drfür scho mol zum Auto gspeeded (also nid grad à la Speedy Gonzalez...) um d'Klimaalag azstelle und d'Wasserfläsche parat z'ha ;-)
Heieiei, soooo gschwitz hän mir bis jetzt no nie do!!!
Mir sin unsere Wasserhuushalt und d'Regulierig vo dr Körpertemperatur denn im Grosse 'M' wieder uf Vordermaa go bringe.
Nachdem mir unseri frischi Wösch denn gholt gha hän, sin mir im Hotel go e Mittagspause mache und siehe da: d'Felicia brucht doch amigs no chli Schlof...
Am Nomidag sin mir denn nomol in Lake Powell go bade und schnorchle - herrlig!! So dass mir grad direkt vom See zum Znachtesse hän könne go (s'Dusche hole mir denn im Hotel noche...).
Morn am Morge mache mir jetzt do no die Tour in Antelope Canyon und fahre denn ca. 2.5h witer Richtig Monument Valley.
Euch schigge mir e diggs Druggi

---