On the way to Page

---

Nachdem mir hüt am Morge no mit em Grosi & Nonno telifoniert hän, sin mir um die 10i umme losgfahre.
Mir sin nomol Ruchtig Grand Canyon, aber das Mol nach rechts (Richtig Cameron). Und no eimol hän mir dr Usblick über und in die eimoligi Schlucht könne wärfe. Das mache übrigens momentan jede Dag au no 30'000, so dass im Juli dr G.C. ei Million Bsuecher het...
Zuedem hän mir no bimene Ussichtspunkt (Little Colorado River Gorge), wo d'Navajos unterhalte, e Stopp ygleggt und dr Little Colorado tief unter uns bestuunt.
Witer isch denn unseri Fahrt gange und zum Glück verlöhn mir uns nid immer numme uf unsers Navi, denn die Tante dört inne het nid gwüsst, as mir in Gap nach rechts müen abbiege, do ihri vorgschlageni Stross scho sit Längerem gsperrt isch. Zum Glück git's au no die guete, alte Strosseschilder ;-)
Denn sin mir afangs Nomidag do in Page acho und hän leider chli e falsches Bild vo däm Städtli am Lake Powell gha! Denn dr See seht me eigentlig nid (isch dr 2. gröschti, künstlig agleggti See vo de USA) und au het's do nid so e würklige Dorfkärn. Aber immerhin sicher fast 10 verschiedeni Chillene...
Und was es do au het: gaaaanz viel Schwiizer!
Die hän mir vor allem im Pool atroffe, wo d'Felicia ihri Taucherbrille und ihre Schnorchel testet het.
Bim Znacht hän mir überleggt, was mir do no alles wänn mache (sicher Horseshoe Bend und Antelope Canyon und evtl. no e Bootstour uf em See) und hän dänkt, s'Hotel würd uns sicher so e Antelope Canyon Tour reserviere, aber nei: 'You can call them yourself!' Ah ok, danke für Ihri fründligi Hilfsbereitschaft, grrrr!!
Jetzt luege mr, as mir morn zytig ufstönge und denn zum Antelope Canyon Tour-Büro fahre und froge dört direkt, ob sie no öbbis frei hän. Und sunst mache mir halt öbbis anders - langwilig wird's und bestimmt nid...
Euch schigge mir e diggs Druggi

---