Advertisement
Published: August 21st 2012
Edit Blog Post
Das ich s beste weekend ever gsi!!!! Macheds eu uf euem Stuäl bequääm und trinked de Kaffi bevor er chalt wird bim läse 😉
Also am Samstig morge isches vom Canada Place uus loos gange nach Whistler. Scho de wäg det hii isch eifach wunderschöön und mer chunt usem stuune ab de Landschaft nüme use. De Ozeanarm reicht wiit is Land ine und d Berge im Hintergrund sind fantastisch.
De erst halt hämmer bide Shannon Falls gmacht, si entspringed useme Gletschter wiiter obe ide Berge und sind zimli hööch. Wiiter isches den gange nach Whistler.Wommer in Whistler acho sind hemmer den gad dörfe stuune ab de krasse Downhill Biker wo da es Festival am laufe gha händ. Überall sind Jungs und Mädels mit irne Bikes und in voller Montur underwägs gsi und sogar Kids kenned da überhaupt nüüt und düsed wie di Wahnsinnige vom Mountain abe. Mir sind den für d Gondola uf Whistler Mountain aagstande und froh gsi hemmer keis Bike debi gha (die hend öpe 45min müsse astah und es isch heiss gsi).
Ufem wäg uf de Mountain hämmer d Biker gseh abe flitze und e super Ussicht becho uf Whistler, es ned all zu grosses
Städtli mit villne Hotel. Obe achoo hämmer zerst mal die hammer Ussicht gnosse und euse Lunch verspisä. Den simmer bizeli gloffe zum is andere Valey luege (mir = mini Gastschwöster Nolwenn und ich). Dänn hämmer d Peak to Peak Gondola bestige fü uf Blackcombe Mountain übere. Es wahnsinns Erläbnis und d Ussicht erst!!! Däne acho hets eus den gad wider us de Schueh ghaue, Bärge, türkisi Seä und stahlblaue Himmel, excellent 😉
Abwärts isches den mitem Sässelilift gange und de Fahrtwind isch genial gsi. Ufem wäg hämmer den mal wider tadaaaa Bäre gseh. De erst isch gmüätlich imene Bächli gläge und hät pfuuset, de zweit isch underem Lift ide Wiise am umelaufe gsi und es het en nöd interessiert das all Touris "ooouuhh a beaaar" grüäft händ. Wider dune acho hemmer den no en Spaziergang dur s Dorf gmacht und überall isch eis Züg los gsi wägem Festival.
Denn hämmer all wider de Bus bestige und sind wiiter richtig Lytton gfahre. Ufem wäg hemmer no en Stop bim Joffrey Lake iigleit. Das isch en galaktisch schöne türkise See mit eme Gletscher im Hintergrund, unbeschrieblich schön!!! Denn simmer dur es schmals Tal nach Lytton gfahre und es isch immer
trochener worde. De Teil isch sozäge d Wüästi vo British Columbia will d Bärge de Räge vom Ozean abfanged. Anere Tankstell in the middle of nowhere hämmer den nomal halt gmacht. Händ eus gfühlt wie im Wilde Weste 😉
Endlich ufem Camping in Lytton acho, übrigens es chlises Kaff im Nirgendwo mit öpe 200 Iiwohner (kei ahnig was die da usse mached), hemmer den eusi Zält für d Nacht bezoge und eus uf de Wäg zum Barbecue gmacht (es isch ez öpe 20:30 gsi). Alli lüüt vom Campingplatz hend sich versammlet für die Barbecue-70er-Party wo vode Rafting Companie organisiert worde isch. Es het natürli Grillierts geh und Riis, Salat, Mais und zum Desert Applepie und Turte mit Schlagrahm und Erdbeeri 😊 AWESOME! Denn isch d Party so richtig los gange mit DJ und Tanz und das alles Outdoor under de Sterne bi sicher 25 Grad 😉 Am 23:30 hani den beschlosse mis Zelt go bsueche, Rafting isch ja aagseit gsi am nögste tag.
ZwischerZwischer hät eus am nögste Morge d Vögel gweckt und dänn isch au scho euse super Busdriver mit em Zmorge cho (en coole Cheib mit Sunnebrülle und Huet). Nacheme feine Öpfel, Saft, Muffin und Farmerstängel
Whistler Mountain
Me on Top of the World :) simmer den zude Rafting Companie gfahre worde und händ det alles nötige für euses Abentüür becho. Imene original gääle Schuelbuss isches den nomal öpe 40min Talufwärts gange zum Start.
Det hät eus dä Timo (en dütsche adventure typ, coole cheib) zu sinere 11 Maa und Frau starke Crew erchlärt und eus netterwiis no mitteilt wie mir wider is Raft zrugg chömed und was mir alles sötted beachte und nume kei Angst wenns eu under Wasser ziet, ihr chömed scho wider us 😉 Zägg simmer auscho im Boot ghoket und hend sini Kommandos güäbt (left back, get down, hold on, paddel haaard), und scho simmer loosgruderet. Am Afang isch de Thompson River no zimli gmüätlich und mir hend Ziit gha zum d Landschaft bewundere. Und tadaaa wider en Bär 😉 Den hämmer di erste chlinnere Stromschnälle (rapids) müsse überwinde was wunderbaar funktioniert het. Nach öpe 30min hets e Stärchig geh, will nacher gahts ab in Canyon. Es riise Buffet mit Frücht und Sandwich zum selber mache het eus erwartet.
Nach dem Mal hets den gheisse festhebe und wiiter gahts. Di erst Rapid im Canyon isch den au gad di heftigst gsi aber mir hends ohni Verlust dure gschaft, aber
dusched hämmer alli 😉 wiiteri Rapids hend gfolgt und nu eimal hemmer öpert müsse usefische, aber es macht hölle Spass und de Teamgeist isch enorm. De Timo isch den au sehr happy gsi mit eusere Arbet. den hämmer eus chöne in Fluss stürze, am Raft hebe und dur chliner Stromschnälle schwüme (de Timo: You can swimm thru these rapids hanging on to the raft. - 5 Sekunde spöter ischer alei im boot gsi 😉 )! Denn isches gmüätlich mit es paar witere Rapids bis is Ziil gange (im ganze öpe 3h rafting). Mir sind alli kabutt, zfride und i trochne Chleider wider in Bus gstige und nach öpe 10min hend glaub all pennt.
4h spöter (nacheme churze stopp in Hope 😉 ) simmer den back in Vancouver gsi. Ich bi dihei go dusche und zägg is Bett und hüt morge hani de Muskelkater vom Jahrhundert gha i mine Ärm und im Rugge, aber es hät sich vollkomme glohnt! Was the best weekend ever!
Sodeli ez gits znacht und den nochli lerne fü min speaking test morn. Stay safe und bis gli, hugs from Vancity 😉
Advertisement
Tot: 0.066s; Tpl: 0.011s; cc: 6; qc: 46; dbt: 0.0429s; 1; m:domysql w:travelblog (10.17.0.13); sld: 1;
; mem: 1.1mb