Harrods!

---

Hüt simmer am morge inere 6. Klass gsi wo au e Studentin schuel geh hät und si isch zimli froh gsi, dass mir ihre ghulfe hend wo d chind ide mathi händ müsse sache schetzä und mässe. Am namitag hämmer de 1. Klasse bim üebe vo ihrem Theater zuegluegt und es isch mega härzig gsii wie di chline tanzed und gsunge händ.

Nach Schuelschluss hämmer den d Tube gno und sind is Harrods gange. Es isch scho vo usse eifach de hammer und den isches ine gange: Dur d Parfümerii simmer ine cho und es hät nach allem mögliche gschmökt und es git eifach alles wommer sich nu cha vorstelle. Dänn simmer dur d'Handtäsche Abteilig durechoo und nei es hät nöd mal Priisschilder gha, für was au 😉 Wiiter simmer zude ägyptische Halle cho wos wükli ägyptisch aaghuuchti Süüle hät und nomee Handtäsche. En churze Uusflug en Stock tüüfer hät eus zude Papeterie gfüärt und au det gits nüüt wos nöd git.

Dänn isches ab zum Schmuck und de Uhre gange. Mär chunt sich zimlich fähl am Platz vor und als ob mr gad de Queen ihri Schmuckchammere beträtte hetti. Überall glitzeretz und glänztz und mer chunt usem Stuunä nüme uuse (woaah lug mal daaas aah, ui und dä Ring...). Au da häts ned vill wo en Priis aagschribe isch, ich glaub mer wills au ned wükli wüsse. Au bide Uhre isches eso und di tüürsti Uhr wommer gseh hend aagschribe isch e IWC gsi für, achtung, 186'000 Pfund! Di meiste Uhre choschtet sovill wie en Chliiwagä oder e Limousine, aber hey wämmers hät 😊

Das Motto gilt au für d Foodhalls, wos alles git wommer sich cha vorstelle, natürli nu s beste vom Allerfeinste. Ide Schoggi und Confisserie Halle sind d Lindorchugle aso grad no s langwiligste und günstigste gsi. Es git Fleisch, Frücht, Backware, Dessert, und eifach alles erdänkliche und das alles zu Priise wos eim Schwindlig wird. Wämmers ned gseh hät glaubt mers wükli nöd!

Dänn simmer in 4. Stock id Huustierabteilig und au da gits alle Schischi und Gaga fü de liebi 4Beiner. Sogar ultra deluxe Hundeguetzli und Fueter. Wämmer sich da bewegt wird eim bewusst wie Dekadänkt eusi Wält eigetli isch, wänn eim bewusst wird das es Lüüt git wo chum z'Ässe händ isches wükli fast scho widerlich :-/

Natürli gits au alles mögliche a Chleider, Schueh, Möbel und sustige Alltagsgägeständ uf dene 4 Stöck, und eis isch schigger wies andere. Mär isch den au zimli schnäll gsätiget vo all dene Iidrück und will igendwie nurno use. Das hämmer den gmacht, sind mitem Buss zum Piccadilly und hend eus det no en Kaffi gönnt.

Nachr simmr mit de Tube hei gfahre und händ Nudle mit Fleischbölelli gässe. Ez gits no chli Fuessball und den ab is Bett.

Stay well, lots of hugs 😉

---