Puuh, die Hitz do!!!!!!

---

Es isch Mäntig z oobe und mir händ do so es richtigs Hitzewuchenänd hinter uns. D Termperature sind mit 39 Grad (gmässe) und bis zu 44 Grad gfühlti Temperatur uf die Zitdur use s högschte wo ich je erläbt han. Han sit 4 Tag nümm meh als 2 Stund am Stück chönne schloofe - trotz Deckeventilator (oder besser Decke-Föhn). Im Norde vo Argentinie hets hüt schiins sogar gfühlti Temperature vo 55 Grad gha! Vergliche mit China wo sie jo -43 Grad hän sind das 100 Grad Differänz...

Han denn au amel e bitz d Nöchi vom Wasser gsuecht. Am Fritig simmer ins Gartebad, wo übrigens nur grad 3 Quadras vo mir dehai entfärnt isch gange. Dört kunnt me im Fall nur ihne wenn me e Stämpel vom Doktor het, dass me keini Fuesspilz und keini Lüs het. Alli Lüt händ denn vor em Igang e halb Stund müesse astoh und em Dökti d Füess zeige und sich in de Hoor umewuschle loh. S Wasser dört isch aber denn nid so dr Hammer gsi. Het sicher au öbbe 32 Grad gha und isch e trüebi Chlorbrüeh gsi - mit tusige vo Lüt drin.
Am Samschtig sind mir denn ane Ort gfahre wo Laguna Azul heisst. Das isch e kleine See öbbe 20km usserhalb vo Cordoba. Das isch denn au superschön gsi dört, s Wasser e bitz küehler und sehr suber.


Am Fritig han ich dr letschti offizielli Schueltag gha in dr ELG Sprochschuel. Do ich aber zwüsche Wiehnacht & Neujoor e ganzi Wuche gfählt ha und zum Teil scho no bitz müeh han, d Lüt z verstoh, han ich mich entschlosse no e Wuche intensiv Privatunterricht azhängge: täglich 3 Stunde zu zweit mit dr Isabell. Wird sicher e asträngendi Wuche wärde.
Nochhär noht denn scho mis letschte Wuchenänd in Cordoba und d Wuche druf heissts denn Abschied näh vo Cordoba und au vo däne vielne Lüt wo ich do in de letschte 6 Wuche kenneglernt ha 😞

Ich wird am Mäntig am 16. Januar mit em Nachtbus nach Buenos Aires fahre. Vo dört gohts denn mit em Flugi nach Ushuaia, dr südlischte Stadt vo dr Wält ganz unde in Patagonie, Tierro del Fuego (Feuerland). Dört sötts denn au vo de Temperature wieder e bitz milder si. In Ushuaia hersche im Momänt Temperature vo 12 bis 15 Grad am Tag.

Die witere Schritt wird ich denn dört vor Ort plane. Ganz grob stell ich mir im Momänt vor, dass ich dört unde 3-4 Tag im Nautonalpark Torres del Paine verbringe wird und denn aschliessend dr Chilenische Gränze entlang nach Norde reis, irgendwenn emol dört denn d Ande überquere und denn in Chile witer nordwärts bis Santiago.

Dört isch im Fall am Samschtig die chilenischi Loveparade 2006 gsi: http://www.loveparade.cl TV Bericht. Das han i leider erscht am Donnschtig z oobe per Zuefall erfahre und dr Bus vo Cordoba uf Santiago brucht mit Zollstop fascht 20 Stund - sunscht hät ich mir das Spektakel uf kei Fall entgoh loh!


Das isch es vorersht emol alles. Do in däm Internetcafe hets nid emol e Ventilator und ich bi scho platschnass 😞


¡Hasta Luego!

---

Photos

Die Laguna Azul
der Ort war bei dieser Hitze wie ein Paradies.

Picnic & Mate
an der Laguna Azul

Chillen im Park
am Sonntag
v.l.n.r. Otto, unser Wachhund, Mate, Karina, Isabell, ich

Abschiedsessen von der Schule
von vorne links im Uhrzeigersinn: Moritz, Karina, Dunia (dahinter), Lena, Peter, Susana (unsere Sprachlehrerin), Jascha, Caroline, Isabell

Comments

[Markus Frei]

Feliz Año Nuevo oder so ähnlich
Hoi Dani Da isch ja unglaublich, mer händ da i de Schwitz minus 5 Grad und Du jammerisch, wiels e chli z'warm isch bi Dir. Am liebschte würdi grad mit Dir wechsle. Ich wünsch Dir no en super Start für Dini Reis und vergiss de "Salar de Uyuni" nöd, wenn Du in Chile (oder Bolivie) bisch. Wenn ich denn die Fötteli gsehne, schiessts mich den so richtig a, dass ich da i de chalte Schwitz im Büro hocke. Also witerhin viel Spass, Glück, Gsundheit und jedi Mengi gueti Erlebnis und halt eus witerhin uf em laufende mit Dinene spannende Bricht und de schöne Fötteli. Vieli Grüess Markus