南美篇 - Iguazu Falls (阿根廷版)

South America » Argentina » Misiones » Iguazú National Park
September 28th 2008

Published: February 3rd 2009

Edit Blog Post

shark7plus

Garganta del Diablo

Devil's Throat - The Largest Waterfall among the Iguazu Falls

大家應該都有睇過visa個廣告...佢標榜去到邊都唔使帶當地貨幣....淨係用visa就得....不過呢招o係呢個地球上都實在係有太多地方係行唔通o既....好似o黎到阿根廷o既Puerto Iguazu，我o地正想買定聽日用o既巴士飛....但係發現手上只得一堆巴西錢....而佢o地係真係唔收credit card的....再加上咁啱今日又係星期六晚 (即係聽日係星期日啦...)...所以找換店晨早就收晒鋪....感謝主俾我o地o係附近搵到櫃員機先攞到錢用~

<在阿根廷遇上牛~>

當我們安頓好之後，其實都過了晚飯時間有一段時間，大家都好肚餓，於是就在鎮內搵o野食。發現原來最多的...係餐廳...但係因為阿根廷紙曾經貶值，同埋我們四個人叫三碟餸，所以其實去餐廳食都係可以接受的~ 再加上素聞阿根廷的牛扒很出名，於是我們就以「据扒」為我們在阿根廷的第一餐~ 結果係點? 阿根廷的牛扒果然名不虛傳~ 真係好有牛味好好食~ 高級西餐廰o既服務 (都ok似o既)，合理o既價錢同埋好食o既牛扒~ hahaha~ 咁樣食晚餐都唔錯喎~!!

<再戰Iguazu>

既然Iguazu Falls係o係巴西同阿根廷中間，咁去得一邊無理由唔去埋第二邊o架~ 所以我o地都好「順理成章」地去睇埋阿根廷o個邊o既Iguazu Falls (今次係阿根廷(西班牙文)，所以串法就變成"Iguazu"啦)~ 事實上，巴西同阿根廷兩邊睇到的瀑布景都真係好唔同，而一般o既說法就係巴西o個邊睇全景，阿根廷就睇近景。哪一邊比較靚就真係見仁見智，不過面積上就阿根廷o個邊大好多啦~ o係阿根廷o既Iguazu National Park有火車由起點連接去Devil's Throat附近，仲有上路同下路兩條「郊遊徑」去近距離觀賞大大小小o既瀑布，再加上可以坐小艇 (免費的~) 上Isla Grande San Martin近距離睇下Iguazu Falls入面第二大的Salto San Martin，淨係行都好多o野睇呢~!! 當然仲有唔少得o既就係近距離再睇Devil's Throat啦~ o個架觀光火車o既總站就係通往Devil's Throat o既trail o既起頭~ 沿住行入去會穿過o的熱帶森林同埋經過o的看似平靜o既河面 (果然暴風雨(指Devil's Throat) o既前夕係平靜的~ 不過話雖如此，其實水流都幾急的~) 一路行的時候見到有幾團應該係觀島團 (帶晒大小望遠鏡)，相信細心觀察下，這片森林都應該係好多o野睇的呢~ 越行越入，水聲就越來越大聲，即係距離Devil's Throat又越來越近了~ Trail o既終點就係位於瀑布上方的觀景台。同昨天相比，現在咁近距離再睇，果然又係另一番感受~ 澎湃o既流水再加廣闊o既地形，完全表現到瀑布o既氣勢同埋神創造o既奇妙~!!

也許...下雨天成為了今次再戰Iguazu的一點美中不足之處。相比起昨天藍天白雲陽光普照，今日都真係落足成日雨，而且仲行雷閃電...還好我們都有雨褸...如果唔係就不堪切想啦...話雖如此整天又濕又凍都真係唔講得笑 (無錯...其實天氣都ok清涼...仲要無太陽...一日之差...天氣變化之大亦都係唔講得笑...) 不過...凡事都總有好o既一面o既~ 整天雨中漫步都有? 無錯~ 因為反正都濕o架啦...我們去到瀑布旁邊都變得「坦然無懼」了~ 濕就濕~ 死就死啦~ haha~ (其實o的介紹都話同o的瀑布咁近距離都濕硬，建議遊客們都著雨褸...haha~ 咁咪仲好...唔使穿下除下咁煩~ 你話係咪?~)

玩完一日，我們又返返去巴士站準備下一站o既旅程啦 (當然唔少得換返o的乾衫同埋企圖整乾的濕衫啦...) 下一站將會係阿根廷o既首都 - 布宜諾斯艾利斯 (Buenos Aires)~ 再上長途巴士的我們今次又被嚇了一跳~!! 點解? 請看下回分解啦~!!

<小插曲 - 郵票之謎?!>

話說...去到每個地方都寄張postcard俾自己都可算係我o地o既習慣。咁o黎到Iguazu當然唔少得啦~ 我們揀咗o的postcard，跟住再諗住睇下公園有無o的特別o既郵票，點知一問之下，竟然要成13 peso (即係大約三十港紙有多...)!!!! 仲要唔係o的咩靚o野...只係就咁貼一條barcode落張postcard度咁大把......真係無o野呀?! 我們梗係唔要啦...於是後來回到Puerto Iguazu度搵...總算叫做搵到o的真係郵票咁樣o既郵票...而且原來寄postcard只係要5 peso...你話公園係咪勁呃錢~!! 不過o個o的郵票o既設計都係勁簡單...無圖案...得數字......我們不約而同地有一個疑問...唔通阿根廷係無靚郵票o既......?!

Additional photos below

Photos: 57, Displayed: 22