On the way to Tusayan & Grand Canyon

---

Wooooow!! Was für en Dag!!!
D'Fahrt nach Tusayan isch laaaaang (über 6h und do sin d'Pause nid ygrächnet), aber guet gsi! D'Strosse teilwyys pfiffegrad und kilometer-wyt nüt vonere Zivilisation z'seh. Dr Christian het sich bsunders gfreuit, as en Teil vo dr Strecki über die bekannti Route 66 gange isch. Und so sin mir denn au in bereits 4. Staat cho, wo mir bsueche: Arizona.
Am halb 5i sin mir do in Tusayan acho (ca. 5km vom Grand Canyon-Ygang entfärnt). Und uf eimol het's dr Christian doch wieder sehr wundergno, was so e Heli-Rundflug über dr G.C. würd koste und drum sin mir bim Flughafe und de div. Abieter go froge. Er überleggt jetzt mol bis morn, ob sich USD 270 lohne, für en 40' Flug über und durch dr G.C...
Nach em Znacht hän mir spontan entschiede, no dr Sunneuntergang bim G.C. azluege, denn uf eimol het dr Himmel doch no ufgrisse. Und me cha sich das irgendwie nid vorstelle wie das isch, denn me fahrt durch e Wald und ufeimol macht's 'bääääämm!' und durch d'Bäum seht me die RIIIIIESE Schlucht!!! Eifach numme HAMMER!!
Dr Frau M. verschloht's jo bekanntlig sälte d'Sproch, aber das isch so e Moment gsi, wo ganz tief gange isch - wunderschön und so was vo ydrügglig!! Danke Natur, für so öbbis Gwaltigs!!
Mir hän denn gluegt, wie d'Sunne untergange isch (leider isch es chli bewölkt gsi) und sin denn no es paar Schritt dr South Rim entlang gloffe und hän eifach numme gstuunt.
Jetzt luege mir no, was mir morn alles wänn mache und wohi as mir wänn go do und evtl. git's jo doch no en Heli-Rundflug...
Euch ganz en schöne Sunntig und e diggs Druggi

---