Advertisement
Published: October 31st 2007
Edit Blog Post
Hey
han äntli en natelnummer ond es nois Natel:-), will triband in sûdamerika nid funktioniert:
+59384479953
nach eine halb wuche in quito hanimi äntli chli iigläbt. zerscht isches scho rächt struub gsi. han mi rächt mûesse motiviere, fûr quito ond fürs spanisch. franz hetmer total guet gfalle in guadeloupe ond jetzt muessi inere grossstadt s verwirrende spanisch lehre. aber mittlerwiile gods ganz guet;-) i wohne mit drü bis vier dütsche girls imene apartment im zähte stock, öpe 20 minute vode sprochschuel entfernt im "touri-neubouviertel". die dütsche sind chli strange, so chli für sich´(´wänd halt alli fùr sich sälber choche ond so...) aber sit em em letschte donnschtig isch no en öschtricherin (cleo) do, voll e liebi ond ufgstellti, mit ihre hanis voll guet.
jetzt isch rägeziit ond s rägnet mängisch am morge am achti chli, ond denn ab de drüne fûr zwoi stond (mas o menos). d sunne schiint ab de halbenüne, was dezue biitreit, dassi meischtens nid früener uufstoh. nachem sächsi fangts scho wieder a düschter werde ond s god relativ schnäll bises ganz fischter isch. quito isch nid ganz ungföhrlich, drum isches ratsam nachem 6i s taxi zneh, choschtet dur de tag mit em taxometer 1.50 US-dollar,
ide nacht aber halt so vell wie sie wänd(also muesches uusfeilsche). bis jetzt bini einisch mit em taxi gfahre, aber nur willi suscht z spot zude schuel cho wär;-)
gföhrlich sind nid nur überfäll, taschedieb mit mässer ond drinks mit droge, sondern de vercher! die kännet so nüt: rot heisst nid fahre, sondern mal luege üb würkli öper chond. fuessgängerample gids extrem wenig ond de fuessgänger hed eh kei vortritt oder rächt. mer muess halt chli besser luege, aber mittlerwiile hanimi scho dra gwöhnt eifach zwüsche de autos durezlaufe. (bin zwar scho einisch fascht mit de cleo vercharet worde, aber mer hend au beide de I-pod dine gha ond hend gredet..:-)
extrem krass findi wied büs ond d autos kein partikelfilter hend, was da a smog produziert wird god scho rácht uf gsundheit. isch eifach nur schwarz hinderem bus, wenner mal gas gid. s andere isch de lärm: am afang ischmers rächt uf de geischt gange: i mim zimmer ghöri halt voll guet de verchehr vode grosse strass: trolleybus wo all hundertmeter brämst ond afahrt, dezue halt s metallische schliife vode leitige; töff ohni uuspuff, alarmalage wo i sämtliche verschiedene tön dauernd hüület, allpot autotwinkels wo 20 sekunde
duuret, siiirene, irgendwelchi pfiiftön kei ahnig vo was, ond am schlimmschte isch eigentlich, dass alli autos ond büs huupet zum d 'lüüt warne. so au taxis zum chunde awerbe... eifach ein meis!!
Ecuador het sit 2001 wäge inflation de dollar als währig iigfüehrt, jedoch nur es paar container voll münze zuegschifft becho. isch also am afang voll de mangel gsi, so dass bald agfange hend eigeti münze z mache, wo zwar de glich wert wie de dollar het, aber nur in ecuadro bruucht werde chan. isch also eis gmix zwûsche richtige dollar ond ihrer pseudowährig, isch rácht verwirrend gsi am afang...
schuel hani immer am namitag vom eis bis am foifi, voll gechillt zum nid müesse uufstoh. han fùr zwoi wuche einzel unterricht, aber gsehs scho cho dassi nochli meh neh muess ( aber voll easy fûr foif dollar pro stond..) spanish isch zum teil rächt nöch am französische ond änglische, aber so wenig verschide, dassi schnäll es gnusch mache...jojo chond scho guet;-) ide schuel gids immer wieder chlinneri aktivitäte wie Salsakurs, chochkurs oder tagesusflüg. die tanzet chli es anders salsa, als ich ide schuel glärnt han, hend defûr aber voll cooli forme😉 im chochkurs chamer nid würkli
vell lärne, wills halt voll¨überfüllt isch ond am schluss keis rezept bechonsch. di heime chochi meischtens spaghetti, tosthawaii oder herdöpfel mit was dezue. isch voll cool, was d frûcht do choschtet ond wases fûr en uuswahl het. uf fleisch hani grad voll ke bock, sitt i im supermarkt d fleischtheke gseh han...als fleischersatz gids halt umso meh frücht, en würkli gueti ananas bechonsch zwüsche 60 cents ond 1.40=)
generell isches nid ganz so billig wienis erwartet han, d globalisation het halt au scho s höchschte andeland entdeckt..mcdonalds, kfc, pizzahut, NESTLE, burgerkill, ... hani bis jetzt nonig gross usprobiert, aber han ghört dasses zimli tür sii söll
Advertisement
Tot: 0.199s; Tpl: 0.011s; cc: 10; qc: 54; dbt: 0.093s; 1; m:domysql w:travelblog (10.17.0.13); sld: 1;
; mem: 1.1mb