Brisbane-Noosa-Fraser Island

---

Zerst mol entscholdigong, för de spoti update, aber ech han i letschter ziit chli müeh gha met em internet zuegang. Wie erwartet hani in Brisbane ah dem obig, nachdem ech dstadt agluegt han, de jacob troffe, und zwar esch er mech am bahnhof öppe en halb stond usserhalb vo brisbane go abhole. nach dem ech bi em dehei zom znacht iglade worde ben, chorz duuschet han (australier send so fröndlechi und offeni lüüt) hemmer en kolleg vo em ufgablet und send uf brisbane is victory hotel in usgang. es riise gaudi hemmer gha. wo die beide denn am 12i hei hend mösse wells am nöchste tag hend müesse go schaffe, hanech mis gepäck usem kofferum gno und ben losgloffe rechtig busterminal wonech die nöchste 5 stond han welle verbrenge, bes min bus gfahre esch. ufem wäg det enne beni aber is gschpröch met es paar andere backpacker cho, wo wäge erem job in brisbane en wohnig hend, und so esches dezue cho, dass ech noch wiitere zwoi stonde fiire de schlossendlech im 24 stock vomene hochhuus i dere backpacker wg uf de couch gschlofe han. en rechtig lostig obig esch das gsi. am nöchschte Tag, in Noosa acho, hanech mech ufe wäg gmacht ufe Noosa Heads coast track, en drüstöndigi wanderig, a unberüerte Stränd, klippe, delfine, und regewaldabschnett verbii, mega schön aber bi ca 35 grad guet schweisstriibend. nachere abchüelende tuschi, und nachdem ech znachtgässe han und wösch gmacht han, beni no en viertelstond go schwemme und no knapp en stond go jogge... obwohl ech nochhär han welle go schlofe, esch ah schlofe ned zdenke gsi, wells eifach zu heiss gsi esch... ergendwenn beni de aber trotzdem iignekt und han mech am nöchste morge met em greyhound bus über unendlech gradi strasse dur unendlechi tannewälder nach Hervey Bay begäh, wonech dlüüt troffe han wonech de Fraser Island tripp zäme gmacht han. För de semmer denn am obig no go iichaufe bevors am nöchste Tag denn losgange esch met denne vier jeeps uf die gröscht sandensle vo de welt. Eifach genial, aber au echli shaky. (esch peinlech aber mer fallt de dütsch begreff ned ihh) über all die offroad strasse, velli schlaglöcher wo die meiste fahrer gar ned erst probiert hend umzfahre, (ech han leider ned döfe fahre welli no zjong ben) semmer bi drüü see gsi, eine inmette vo sandüne, en andere inmette vo Regewald und en andere wos wasser dur die velle teebäum rond ome ganz orange gsi esch. Das chamer sech ned vorstelle wemmers no nie gseh het!! nachemene spontane flog öber die ensle met start und landig ufem strand, wonech chorzerhand entschlosse han metzmache, zwoi lostige öbige, met vell bier, BBQ und Dingos (dene welde hönd, wo öberall omesträuneret) und velle unterhaltsame moment, semmer höt obig weder zrugg in Hervey bay acho, womer das ganze bimene gmüetleche obig jetzt no lönd lo usklenge.. fazit, es verlornigs sackmesser, en durchnässti, vermuetlech kaputti kamera (drum kei belder) und vellne erennerig froi ech mech jetzt scho uf de sägelturn ide whitsundays ines paar täg. ganz en liebe gruess, Marco

---