Advertisement
Published: February 7th 2013
Edit Blog Post
Zerst moecht ech mech mol entscholdige, dass mer so lang nuet meh het choenne uf dem blog laese. aber es esch mer eifach emmer oepis dezwoesche cho, wenn ech de blog han welle aktualisiere. Sigs dasi us ergendeme grond de trotzdem kei ziit gha han oder dass mer de labtop bim flog uf alice springs im gepaeck kaputt gange esch... aber jetzt hets jo doch weder mol klapped.
min letschte obig uf magnetic island esch sogar no es xfache besser gsi als echs erwartet han. a dem obig esch naemli ide bar Boozy bingo agseit gsi, sone art lotto. Mer het det bi diverse ufgruefte zahle choenne shots gwoenne, oder eifach wemmer schaertli voll gha het, en wiiteri oebernachtig oder en Bierpitcher usw. Aber all hend natuerlech ide letschte rondi welle de jackpot gwoenne, was ungefaehr 865 dollar gsi send. und ech weiss au ned wie vell gloeck ech a dem obig gha han, aber ech han die ganzi kohle abgruumt. Das natuerli esch grad nomol en wiitere grond gsi zom fiire, und das hemmer denn au gmacht. nach es paar stonde usgebigem fiire und tanze, mehrere ronde shots und bier, hani de zwar a dem obig oeppe
150 dollar usgaeh gha, aber es esches wert gsi. am noechste morge beni uh frue ufgstande zom die erst faehri zverwoetsche und min greyhound bus nach cairns. de, so hani de in townsville afeng erfahre, esch aber gstreche worde. well de ganzi highway in norde oeberfluetet esch, vellecht hend er jo ghoert vo dem zyklon ade ostkoeste und de enorme nederschlaeg... so hani de halt chorzerhand en flog buechet uf cairns, skluegste woni han choenne mache, schoesch waeri wahrschiinli no 4 oder 5 taeg in townsville festgsaesse. in cairns hani de 2 schwede kenneglernt, de max und de freddie, wo zuefaelligerwiis au am noechste tag de gliich 5taegig tauchkurs agfange hend wie ech. Die erst zwoi taeg in cairns hemmer also zaeme im trainingspool und klassezemmer verbrocht und am obig ide diverse clubs und bars in cairns. am australia day, semmer de met eme tauchboot ufs Great Barrier reef use, oebrigens au es riise gloeck, well ueses boot serste set ere woche gsi esch wo waege de wetterbedingige oeberhaupt gstartet esch. nach de erste tauchgaeng zaeme met em instruktor hemmer denn ueses zertifikat becho. ech ben jetzt also offiziel zertifizierte open water diver. die noechste tauchgaeng hemmer de jewiils nor
met uesem buddy, sprech em tauchpartner gmacht. dasch scho mega beiidrockend met denne koralle und all denne fesch. es werkt so surreal und fredlech. es esch eifach genial schoen, esch eigentelch schad dass ned laenger als 40 minute am stoeck chasch oder wasser bliibe. mer hend denn au no en nachttauchgang gmacht, womer nor wenigi meter vo ues entfernt en hai gsechtet hend, ebefalls uh imposant. obwohl's gsetzlech gseh ned erlaubt gsi waer, luut e, tauchusbeldner aber kei gfahr foer gsondheit bestande het, han ech de am tag nachdem mer zrogg in cairns gsi send am morge frueh en fallschermsprong gmacht. 14000 ft, ageblech 60 sekonde freie fall. Eifach abartig, unbelievable, incredible, atemberaubend, superhammer, AWESOME!! wahrschiinlech oepis vom geilste woni je gmacht han. ca 3 stonde spoeter beni denn uf alice springs gfloge wo en tag spoeter mini tour rechtig adelaide gstartet esch und am gliiche tag no min labtop kaputt gange esch. doch es het mech gar ned gross ufgregt well en tag wo so guet agfange het chan au das noem zor sau mache =) gstartet semmer de am noechste tag oeppe z20iste rechtig kings canyon. nachere nacht im swag, sone art matratze schlofsack, unter freiem hemmel hemmer
de de kings kanyon omwanderet. nach dem marsch semmer de rechtig uluru gfahre. doch do halt sautofahre in australie emmer chli meh ziit beasprocht hemmer erst am noechste morge ziit gha de ayers rock, ebe uluru, zerkonde. zerst semmer aber no d'kata tjuta go aluege, was mech chli verrockt gmacht het, well ech i dere ziit naemli grad so guet de uluru het choenne bestiige weller am morge ebe no offe gsi esch unds en denn am 8i gschlosse hend, so esch mer de halt nuet anders oebrig blebe als met allne andere am nomitag om de riisigi felsbrocke omezlaufe wo scho au mega iidroecklech gsi esch, aber er kennet mech jo, wenn ech mer mol oeppis in chopf gsetzt han... de folgendi tag esch denn en ca 10 stoendigi autofahrt gsi, entlang vom stuart highway nach cooper pedy. det hemmer en opal mine agluegt, i somene unterirdische dugout oebernachtet und bi pizza und bier zaeme de sonneuntergang gluegt. au am noechste tag semmer weder relativ lang unterwegs gsi. a salzsee verbii, dur unendlechi wuesti, oeber unendlechi gradi strosse abe nach port augusta und wiiter nach wilmington, womer es letschts mol im swag gschlofe hend. I love my swag. geniali
erfendig. bevor mer aber send go schlofe, hemmer no sgloeck gha dass en wiitere tourguide am gliiche platz halt gmacht und sis partyequipment uspackt het. so hemmer also zmetz im nirgendwo met nebelmaschene und farbigem bletzliecht und luuter muusig bes spot id nacht gfiiret. Am noechste morge hemmer de die letscht etappe no under draeder gno, aber hend zerst no im sogenannte alligator gorge ide southern flinders ranges en chorze aber gmuetleche marsch gmacht. am obig hend mech de theres und de wayne im stadtzentrum vo adelaide abgholt, das esch oebrigens minere nochberiin dschwoester und de maa, wo do in adelaide wohnet und mer abotte hend bi ene zschlofe. met vell schlofe esch aber nuet gsi, well scho am halbi 6i am noechste tag hani muesse ufstoh foer de kangaroo island trip. en geniale trip met geniale luet, wie au ufe letschte trip natuerli... uf kangaroo island hemme uh vell gmacht. zb. ufere farm imene buur bim schaf schere zuegluegt und chli oeppis oebber sis business erfahre, ade seal bay sealoie beobachtet, kayakfahre ade vivionne bay, bsuech vode remarkable rocks, em admirals arch und de seehoend dette und natuerlech hemmer au no ziit gha zom ade stokes bay echli an
strand zlege und set langem weder mol im meer go bade. jetzt beni relativ mued und froi mech ufne gmuetlech erholsame tag morn in adelaide. gruess an alli, Marco
Advertisement
Tot: 0.106s; Tpl: 0.011s; cc: 7; qc: 44; dbt: 0.0361s; 1; m:domysql w:travelblog (10.17.0.13); sld: 1;
; mem: 1.1mb