Boat Party :)

---

Tadaa und scho sind zwei Wuche verbi, krass! Aso di letschte paar Täg sind eifach so verbi gfägt, es stellt sich mit de Schuel en gwüsse Alltag ih. Trotzdem gits wider e chli öpis z brichte. Ab und ah gömmer nach de Schuel no zäme is Pub zum eis trinke oder an Beach go Ufzgi mache. So wiit laufts zimli guet ide Schuel.

Am Donnstig simmer am Abig no in Safeway, das isch en riiiiisige Migros. Es isch eifach alles überdimensional gross und vo allem gits gfühlti 100 variante (es 20m regal nume mit Cornflakes 😉 ). Nach dem Erläbnis hemmer ufem Heiwäg no 3 Vierbeiner aatroffe, huch nei kei Füchs oder Stinktier (zum glück) sondern Waschbäre. Die sind da zimli wiit verbreitet und au ned bsunders schüüch 😉

Gester (Friitig) hämmer nu am morge schuel gha und sind den zägg hei will am 17:30 hets gheisse "Boot Ahoi!". Mi sind mit em boot vo False Creek uf de Pazifik (English Bay) use gfahre und hend ufem Deck fliisig Party gmacht. Es isch eifach en hammer Trip gsi und de Sunset ufem Schiff isch eimalig! Vom Hafe isches den direkt ad After Party im Gossip gange wo mir natürli alles geh händ 😉 Am 12i znacht hemmer den de Marta zum Geburi gratuliert und di letschte Energiereserve uspackt bevor mr den am 12:45 uf de Skytrain gwatschlet sind. D VanCityRockers händ die Party unvergässlich gmacht! 😊

Hüt isch lerne und eventuell nochli chille am Beach aagseit. Morn gahts den uf Granville Island go Zmittag ässe und live Musig lose. Looking forward to it 😊 hebeds guet und stay well, huuugs from VanCity 😊

---

Photos

False Creek
towards English Beach

VanCity
in the distance