Dietwil-Genua-Monaco-Nizza

---

Neu gstartet in Dietwil, hend dLaura und ech üs ufem schnellste Wäg rechtig Süde ufgmacht. Bide Abfahrt het s'Wätter noni grad grandios usgseh, aber womer denn in Airolo usem Loch usecho send, hemmer trotz allem müesse dSonnebrölle alege. Wiiter eschs gange uf italienische Autobahne rechtig Genua, womer nach langem Wäg plötzlech gmerkt hend, dass mer es Fensteli vo üsem Hochdach verlore hend. Noch langem Flueche und Herne, und nochdem dass mer denn au no gmerkt hend, dass mer Benzin verlüred, semmer met echli komischem Gfühl im Mage denn go schlofe, und zwar direkt am Meer chorz vor Savona. Det hemmer au am nöchschte Tag s'Benzinproblem chönne löse und s'Fenster vorübergehend verschlüsse. Dör diversi Städtli esches denn alles am Meer entlang rechtig französischi Grenze gange, womer denn au szweite plätzli zom öbernachte gfonde hend. 5 Meter vom Meer entfernt. Perfekt!! Höt, am drette Tag semmer wiitergfahre uf Monaco, hend üs die Stadt per Velo chli agluegt, hend meh oder weniger ungwollte Kontakt met de Police Maritimes knöpft, womer aber glempflech weder devo cho send, und womer ab all dene Yachte nöm hend chönne ufhöre stuune. Jetzt hockemer grad met volle Büch imene McDonalds, grad am Strand vor Nizza, womer üs secher au nochhär nochli id Sonne leged und gönd go bade!

---