Guadeloupe, finalement

---

Han voll nid gwüsst, dass Puerto Rico zu de USA ghört, jedefalls hends mi bide usreis extra usegno ond mis handgepäck uf sprängstoff dursuecht ond putzt. gsehni so kriminell us, oder isches eifach willi mit em finnische pass undewägs bin ond d amis sogar angscht vor nachbere vo alt-komunischte hend?¿
dasmal klappt alles guet, aber chum bini ide luft, fangt au grad scho en guadeluopianer mich a z bekehre ond versuechtmer no en wundertrank aztreie, wo extrem positivi uswürkige uf mich ond mis umfäld hetti! ich wär sozäge de noi messias... ond i sächs johr weri au scho millionär, haha wers glaubt wird selig;-)
d nora het immerno extrem starch fieber ond am sunntig chanmi niemerd go hole, d büs fahret nid aber s het ja auno taxis. vode nora hani scho gwüsst, dass d karibik tüür isch, aber dassmer z vierte an gliche ort JE 40 Euro zahle muess, isch ächt pervers!!
mit eim caracho fahrter dur cooli hügellandtschafte, aber s meer isch bisjetzt wiit ond breit niened z sgeh. ûberall sind chüeh, wasserbüffel, hüener, chatze ond hünd näb wällblächhüttene ade leine. so hanmer d karibik nid grad vorgstellt, isch aber halt de kontrascht zum paradiesische strand. d lûût sind generell dusse ond s huus isch i dere drückende hitz nid so wichtig ond gepflägt, villmeh s auto als krasses statussymbol!
amene platz laht er mi denn use ond en krass fiebrigi nora chondmer entgäge. sie het zwar nid so wiit gha zum laufe, ond mini underkunft binere family isch au nur grad hundertmeter enfernt, aber sie gheit i dere hitz mit dem fieber fascht übere! sie hedmer en voll chilligi familie gfunde, 30 euro pro nacht inklusiv z morge ond z nacht.
churz drufab gömmer is zentrum füre ond de strand chond langsam i sicht, so liislig hani auscho de steelbandsound im ohr:-), s wasser isch krass schön türkis-blau ond de strand mit de palme eifach nur geil! chans gar nonig so rächt realisiere, dassi würkli acho bin.
mer chillets nochli im americano (e bar am strand) ond gönd denn nach paar stond wieder hei, wills halt am sächsi scho dunkel wird. mini gaschtmuetter het scho s ässe parat gmacht: lamm, riis, bruni bohnecreme(woni zerscht as dessert igschätzt han) ond en chlini mango. rähct müed goni am achti scho go penne, oder ich probiers zumindescht mal, denn i dere hitz isch das gar ned so eifach!

---