Aninuan-Small lalaguna

---

Mini liebe Fründe und Familie

Ich weiss, ich han mich scho lang nüme gmäldet...mindeschtens nid über dä Blogg. Das lit nid a dem, dass ich da nüt erlebe und drum nid wüssti was schribe...äs lit au nid dra, dass i eu vergässe hetti und zum ganz ehrlich si, lits au nid dra, dass i kei Zit han. Ich bin zwar immer guet beschäftiget aber eigentlich findt mer dänn doch immer Zit. Ich bin eifach nur schribfuul gsi.
Ich han da ä super spannendi und lehrrichi Zit. Mit minere Usbildig gahts vora und ich wird wahrschinlich so in ungefähr 10 Täg Divemaster si (wer hätte das gedacht).
Fascht jede Morge gang i mit ämä hapel-hapel (bimene Motorbike hindedruf sitze) bis nach Puerto Galera und vo det us mit äm Trycicel (Töff mit überdachtem Sitewaage....und ja, äs chunt scho vor, dass no 7 anderi im, um und am Trycicel sind) bis nach Aninuan. Det isch die zweiti Basis vom Divecenter. (im erschte Blogg häts Föteli vo dä Eröffnig). Det bin ich mit mim Instructor und äme andere Divemaster-Kandidat. DTauchplätz sind nid so vielsitig wie in Sabang und au bedütend weniger, aber däfür teils no unentdeckt und sälte vo ander betaucht. Das git ois immer wieder dMöglichkeit eifach mal los ztauche und zluege, was äs suscht no hät. Das isch ganz spannend und da ein Teil vo minere Usbildig au sKartografiere isch, isch das natürlich grad ideal...für min Orientierigssinn ischs natürlich au super chli träning zha. DGäscht lönd no chli uf sich warte, drum hämmer viel Zit Üebige zmache. DRägezit isch no nid ganz verbi (sött aber bald), so gits au guet Zit, dass ich mich chan mit dä Theorie usenand setze.
Im Februar erwarte mer dänn meh Lüt, was vom Timing her ideal isch.
DFischvielfalt isch überwältigend und äs git chum än Tauchgang wo mich nid würklich is Stune versetzt.
Bilder chan ich eu leider nid viel liefere, weil i eifach fascht kei mache..ich nimm mers immer wieder vor, aber dänn....
Mitti Februar chunt mich dänn dAndrea und im März dSimone go bsueche, dänn gits sicher au chli meh Usflüg und dementsprächend Föteli.
Ich froi mi, bald wieder mal schwizerdütsch zrede. DBsitzer vom Divecenter reded sehr guet dütsch und min Instructor chunt sogar us Dütschland, ansunschte chänd da alli sehr guet Englisch, aber das isch halt doch nid zgliche. Mit mim Tagalog haperets no chli (zum ehrlich si, ich chan no fascht nüt). Han mer aber ganz fescht vorgnoh, meh zlärne, wenn i mit äm Divemaster dure bin. Ich wirde eu uf äm laufende halte.
Ich lade eu jetzt no äs paar wenigi Bilder ufe, dass ihr chli än Ahnig händ, wies bi mir so usgseht.
bis dänn wünsch ich eu magandang gabi (än guete Abig) und ihr ghöred wieder vo mir

Luzia

---

Photos

sResort wird vergrösseret..
...dä Pool isch mittlerwile fertig, aber so dräckig, weil rundume immer no Baustell isch, dass niemert go bade gaht :-)

Leo
Wiehnachte im Divecenter mit Gschänk vo allen und für alli

Mac Mac
the singing boatmen

Jane und Marlon
am Silvesterabig