哈域斯→布達佩斯(2006/7/23)

---

早上去左睇巴力頓湖,係全歐洲最大o既湖。大到佢丫...你唔會望到邊界,好似一個無邊無際o既大海,唔怪得有「匈牙利之海」之稱!之後去布達佩斯。去到布達佩斯有一個當地導遊帶我地行,佢真係正如我地o既導遊所講,好似mr bean!救命呀真係好似!連講野都似,一舊舊咁唔知佢講乜。先去英雄廣場,再去漁人城堡。漁人城堡建於城堡山上,望番落去個景極正。之後上蓋列特山,o個度望落去仲靚!兩度都望到多瑙河,又不禁諗起約翰施特勞斯創作'藍色的多瑙河'o既故事。呢日o既晚餐好好,係匈牙利民族歌舞晚宴。哇,拉小提琴o既o個個人,好勁...羨慕死我啦。可能係最後兩晚o既關係,大家都玩得好癲,我地有一位團友仲走上台跳舞、劈酒!嗯,好開心,但熱鬧過後,番酒店時又難免寂寞。呢一晚有趣事,就係因為太夜,司機睇唔到路牌,蕩失路!搞左差唔多一個鐘先揾到酒店!有個團友話「咪當送多個夜遊lor!」 哈哈,即刻笑番。

---

Photos

佩斯
布達佩斯分兩部分,我地身處o既河右岸係布達,相中就係河左岸o既佩斯啦。

自由女神像
位於蓋列特山上,手執o既係橄欖葉。呀...我好鍾意呢張相,咁o岩影到d鴿飛過,好靚。

當地導遊mr bean
哈哈哈哈。

Comments

[anonymous]

Could you type it again?