Denn mol zu mine Aktivitaete....

So ihr....ich bis scho wieder.
Wett eu doch mol zeige, wanich do so triibe di ganz ziit...

Ich bi i dae Altstadt vo Quito chli go spaziere und go ae Chile und ae Kathedrale besichtige. Aes isch bitzli komisch i daere Altstadt. Eigentlich soett mae jo meine, die Luetlis doete segid sich a Tourischte gwoehnt. Aber die haend mich alli aglueged, wie aen Usserirdischi...und dementsprechend vorsichtig binich daenn au umegloffe. Brav mitem Rucksaeckli vorne, wies im Reisefuehrer beschribe isch. Normalerwiis - wie ihr eu vo mir wohrschinlich nid choend vorstelle - mach ich mir do "unne" nid so viel us daene ACHTUNG**-Kommentaer. Ich laeb eifach in Tag ine und kuemmere mich nid um Meldige vom EDA usw....ich wott eifach gnuesse und siiiii....und nid unbedingt alli Vorsichtsmassnahme beachte wie sonen richtig korrekte Schwiizerbuerger. Ich merk a minere schwiizer-Kollegin, dass au andersch goht...uf alles lose wo mae ghoert und verzellt und list - do wuerd ich jo kapputt goh uf minere Reis. Also mir isches wohl und ich fuehl mich sicher do in Quito.

Da Weekend binich daenn nochere ziemlich durchzechte Nacht mit Muskelkater vom Salsa tanze und noch 4 h schlofe mitem Bus 2h noch Otavallo gfahre, doet haets aen riiiesige Markt. Die ganz Stadt ischen Markt. Eifach unglaublich....mega billigi Sache, wo minere Meinig no ae gueti Qualitaet haend. Ha mich grad mol chli mit Mitbringsel ideckt - wa genau chanich jetzt natuerlich nid verzelle* hihi. Ich weiss jetzt nume, dass die Chauffeur do nid wuerklich ae Lizenz bruched...phu....hei isch dae grast. Alli Auto sind vomene riese Car ueberholt worde...ich bi sooo froh, hanich mini Anti-Chotz-Tablettli daebi gha.

Und am Sunntig binich daenn miteme Lift (Teleferico) uf dae Pichincha uegfahre, zaeme mit dae Sylvie us Fribourg. Dae Vuklan Pichincha chame mitem Lift leider nid erreiche und au nid gseh, aber mir sind uf dae "Berg" Pichincha uegloffe, wo sich naebed aem Vulkan befindet. ca. 2h...und ich saeg eu...mir sind fascht uf 4200m obe gsi und mini Lunge haet sich agfuehlt, wie aen chliiiine Plastiksack...wo mit Liim gfuellt isch. Unbeschriiblich da Gfuehl. Wie wenn mae meega chrank waer. Ich ha chum Luft uebercho und bi froh gsi, wonich wieder i dae Stadt unne gsi bi, aber d Ussicht uf Quito isch genial doet obe***

Und geschter binich daenn no gaaanz elei zum Aequator gfahre, mitem Bus. Ha ca. 1,5 h gha fuer ein Weg und da het ca. 40 Rp. koschtet. Eiii....und daenn binich i daem grosse "Touristedoerfli" umegloffe wos extra um die Aequator-Statue ume baut haend. Ich ha chli gfoetelet und chli Selbstgsproech gfuehrt und daenn hanich per Zuefall bim Usgang ae Museum agschribe gseh und bi us luuter Gwunder doet ine...und daenn moend ihr lose - Da ganze Denkmol und dae riiiese Rummel um die Aequator-Linie isch gar nid bim richtige Aequator...die isch naemlich i daem chline schaebige Museum, ca. 50 m naebed dra. Hahaaa...und ich ha di WOHR LINIE gfunde* juhui. Ha doet daenn ae Fuehrig uebercho mit paar luschtige Experiment... (ha no ae Filmli aghaenkt...aber weiss nid oebs funktioniert....)

so, da waers mol fuer dae moment. Ich ha jetzt gnueg vo daem doofe Compi. Dusse isch schoen Wetter, und da isch selte....



lg und b.b.
Marion

---

Videos from "Denn mol zu mine Aktivitaete....":

---

---