Un gran dia en la Estancia Santa Susana

---

Juhuuu, äntlich ächli Landluft schnuppere und nöd immer Buenos Aires Abgas und Hundedräck :P Hüt ischs ufen Bsuech uf e sogenannti Estancia (argent. Ranch) gange, öpe 1ehalb Stund vo Buenos Aires Stadt entfernt.

Mi sind scho supernett empfange worde. Gauchos i voller Montur händ ois persönlich mit Handshake und Kuss ufd Bagge, so wie sichs ghört z Argentinie, begrüesst. Churz druf abe sinds scho mit Vino Blanco und Tinto (Rotwii) cho und natürli mit Empanadas (Teigtäsche gfüllt, traditionellerwiis mit Rindfleisch). Die händ so richtig Lust gmacht ufs baldige Asado (Grille uf offenem Füür) zum Zmittag.

Chum simer mit Empanadiere und Wii trinke fertig gsi, hämer sälber defe ufd Rössli chräsme und en chline Ritt go mache =) Scho bald hätmer gmerkt, dass sich d Gauchos aso gern fötele lönd (findi guet, die händ au superguet usgsend :P).

Nachme Mini-Usritt händ all Lüüt zäme chöne inen grosse Saal wo ich und mini Mitbewohnerin Ricarda mit Abstand di lustigste Äss-Nachbere gha händ! Bob, sini Frau d Sue und d Kollegin d Chilly. Ali öpe um di 70 ume aber fit und parat fürs Läbe wi drü frischi Turnschueh! Und natürli immer füren Scherz zha, wie Lüüt vo Ängland halt so sind 😊 Dä Bob häts natürli nöd chöne lah, mir de eint Gaucho-Chällner namens Jorges (sprich: Chórches, mit Betonig uf ooo) vorzstelle und im jedesmal bim verbigaa zsäge, wie toll das ich ihn find :D (was natürli nöd gstumme hät :P) De Jorges hät dänn aml gantwortet, das ich ja sini sächst Fründin chönt wärde! Jajajjaa so sind die halt 😉

Nach dem perfekt vom Füür gräucherete Beaf-Steak undm dezue im Abgang passende Rootwii vo Mendoza (Los Primos, Jahrgang hani vergässe) häts no e Tanz und Music Show gää. Zu Tango, Samba und Stepptanz isch gfäschtet worde.

Höhepunkt zum Schluss: Gauchos händ mit ihrne Ross no zeigt was si büte chönd! Abäscrolle und Föteli aluege, ich han nur gstuunt!

Fazit vom Tag:

1. I'm a lucky woman (gemäss Sortija) !

2. Nöd so vill cooli Traveller-Gschichte verzelle lah vo ältere, muntere, witzige, wiitgreiste Lüüt, die mached nur na Lust zum länger weg vo dihei sii und di ganz Wält wele go aluege 😊)

3. Sunnecreme besser istriche, s hät mi verbrutzlet! -.-

---

Photos

Bienvenidos al Estancia Santa Susana
Herzlichs Willkomme mit Wii und Empanadas

Schöni Verzierige
..mit Inka-Muster

Bife, Pollo, Chorizos..
...nichts für Vegis!

Yummmie!
Muuy iresistible el Bife!

SteppTanz
Looks like Johnny Depp, no? =)

Sortija (trad. Gaucho Game)
De Gaucho muen im gstreckte Gallopp mit some bleistiftähnliche Stab es Metallringli träffe..

Sortija (trad. Gaucho Game)
...3 ufs Mal!

Sortija (trad. Gaucho Game)
...wänner s Metallringli tüpft, derfers annere Frauschänke, ihre en Kuss gää und das bringt ihre Glück! Phu, I'm a lucky girl!