My first week in Vancouver

My first week in Vancouver…

I mire erste Woche da in Vancouver hani scho einiges dörfe erläbe u scho diversi Idrück chönne sammle.
Aber alles schön dr Reihe nache… Am Mäntig het mini Schuel agfange u i ha de gad mau sehr viu neui Gsichter gseh. Es isch sehr interessant gsi mau chli mit dene Lüüt zrede u chli z erfahre vo wo sie chömid. Es het sehr viu Brasilianer, Japaner, Koreaner u Schwiizer. Isch chli schad, vor allem i de Cambridgekürs hets fast nume Schwiizer. Aber mir si es cools Grüppli vo acht Schwiizer im CPE-Kurs u es fägt, o wenns sehr usefordernd isch u eim ds Gfüehl git mer heig kein blasse Schimmer vo Änglisch.
Nachem erste Mau richtig Unterricht am Zistig si d Barbara u ich de in Stanley Park. Nach dem mer bi de Totempoles gsi sii, simmer de düre Wald zum Beaverlake. De Wald isch uu schön u o dr See gseht rächt speziell us. Er isch nämmli scho fast zuegwachse. Ufem Heiwäg richtig Downtown hei mer de sogar na en Waschbär gseh.
Am Donstig simer de uf Granville Island, das isch en chlini Halbinsle zwüsche Downtown u Südvancouver. Derte hets en Märt, wod alles mögliche chasch chaufe - sogar normals Brot ;-) U bi de einzelne Ständ isch aues so schön agrichtet, da bechunnt mer gad Hunger wemer dert inne isch…
Am Friitig u Samstig isch de ds Rosh Hashana, ds jüdische Neujahrsfest, gsi, das heisst mer hei am Friitig Abe es riiisigs Dinner bi mire Gastfamily gha u am Samstig Abe namau eis bim Brüeder vor Tamar. I han de bi däre Glägeheit o gad die ganzi Verwandschaft kenneglehrt u das si aues uu cooli Lüüt u es isch sehr amüsant gsi. I ha de o usegfunde dass ken Mänsch weiss wo Bern isch, die kenned alli nur Genf und Züri ;-) Die beide Dinner si sehr speziell gsi für mich, aber en super Erfahrig. I han mau aui Ritual u Traditione mit hebräische Gebät u typischem Ässe u aues drum u dra dörfe kennelehre.
Am Sunntig het de di grossi Useforderig uf d Barbara u mich gwartet - dr Grouse Mountain. Mir hei beschlosse uezlaufe u hei das de o i Tat umgsetzt, au wenn mers scho relativ gli bereut händ wiu eifach aues nur Tritt si u eigentli nid en wirkliche Wanderwag u die Tritt zum Teil elend höch sii u mer eifach kes Ändi gseht. Womer de nachme Wiili mau ds Schild gseh hei, dass mer afe en Viertu hei, simmer gad chli schockiert gsi. Anyway, mer si de nach zwe Stund (anderi bruuche 23Minute…) ufme steile, stuuferiiche u glitschige Wäg obe acho u hei die wunderschöni Ussicht über Vancouver u Umgäbig chönne gniesse. Mir si de mitemne SEHR langsame Sässelilift na ganz ufe, u di Agstellte hend allne Lüüt müesse erkläre, wie mer Sässelilift fahrt, wiu so viu Lüüt das na nie gseh hei. Na viu besser isch de aber gsi, womer mit de Gondle (natürli made in Switzerland) wieder zrügg si. Wenns nachem Maste abgsackt isch u gschwunge het, hei aui afo kreische (trotz Vorwarnig) u aui si absolut erstuunt gsi was da passiert. Mer het de o sofort gseh, wer das Schwiizer isch…

U da na einigi Kurzinfos:
- Cake is no dessert, it's for tea!
- Poulet isch kei Fleisch, das isch Poulet!
- Z Kanada isch alles riesig (usser A4 Papier u Couvert)

So, u ietzt wartet namau es paar Phrasal verbs, Idioms u anderi Expressions uf mi…

Liebi Grüess us Vancouver

Petra

---

---