Hello Vancouver

---

HalliHallo ihr liebä wo min blog wider verfolged 😊

So endlich chum ich dezue vode erste zwei täg da in Vancouver z brichte. De flug vo guet 11 stund hämmer guet überstande (hend ja in Calgary en zwüschestop gmacht) und sind den am fritig 14:10 in Vancouver glandet. Mitem taxi simmer zu eusem neue dihei gfahre wo eus euse gastbrüäder Ryan willkomme gheisse hät. Da mir beidi scho zimli k.o. gsi sind hämmer churzerhand eusi zimmer bezoge und eigetli hämmer welle go aneligge aber zerst hämmer natürli nochli müsse en schwatz halte, zudem isch gad euse Gastdaddy de John heicho. Beidi Herre im huus sind mega nett, offe und lustig. Nacheme churze nap hemmer den auno d Marian känneglernt, euses überfründliche und hilfsbereite Gastmami. Zudem wont no en Studentin us Paris da, d'Nooään (so säggeds ihre ämel). Mir sind da wüklich härzlich ufgnoh worde und es sind auno gad am John sin brüäder de Peter und dem sini frau d Chris uf Bsuech cho, was bedütet hät dasses es riiiise Barbecue geh het mit Self-Made Sushi vom John, Lachs, Poulet, drü Salat und Maisschölbe. Zum glück gits da Kaffi, sust wäred mir glaub am Tisch iigschlafe (mi sind beid guet 26h wach gsi) 😊. Ja am nüni simmer den auscho is Bett abdüüsed.

Gester nachere meh oder weniger durschlafänä nacht het de John eus nachem Z'morge ufen chline Trip durch Burnaby (das isch euse Wohnort) mitgnoh. Mi sind uf de Uni-hügel gfahre (hend uf em wäg euses erste Deer gseh) und den uf Burnaby Mountain. Vo da hät mer e mega Ussicht über Vancouver und au richtig Berge. Er het eus den zu de einzelne Sache womer gseht natürli no so einiges verzellt und ich bi eifach nume fasziniert gsi. Dänn simmer no zum Burnaby Lake, dä liit imene riiise Park und isch sicher so gross wie de Pfäffikersee. Det hemmer en Spaziergang gmacht und sind den zumene Stäg cho wo in see ine füärt. Es isch eifach super grüän da überall! Denn simmer wider richtig Hei gfahre.

Am halbi vieri isches den los gange nach Vancouver City, wo es Füürwerch Festival stattfindet, "Celebration of Light", wo 3 Natione dra teil nämed. Am erste abig isch Vietnam dra gsi. Mitem Skytrain simmer also nach Vancouver Downtown gfahre und d Marian het eus stehts verzellt wo mer je nach Station chan anelaufe, was cool isch zum gseh und eifach alles wommer mun wüsse. In Downtown hemmer den vor de LSC Schuel (eusi Schuel) no Fründe vode Noän troffe (si gaht au det id schuel). Mit all dene simmer den ad English Bay gfahre mitem Bus. Da ade Bay hämmer eus den uf ere Wisä niderglaah (es het natürli au Strand) und hend chli gschwätzt und de villne Lüüt zueglueget wo am umewusle gsi sind. Den hämmer eus natürli au öpis zum Znacht postet, griechische Kebab und Tzatziki 😉 Selbverständlich hani au mini Füäss scho müsse in Pazifik hebä und jaa ich ga sicher go bade 😉 Dänn am 10ni isch s Füürwärch loos gange. Dank eusne Platznachbere hemmer sogar de richtig sound gha vom Radio. Es isch zimli cool gsi, aber s'Zürifäst isch zimli genau so hammer 😉 Nachdem s fertig gsi isch, hät d Marian eus immene superturbo Tempo ad Skytrain station gfüärt und es isch nöd emal soo crowdy gsi. Öpe am elfi bini den zimli müäd is bett gheit.

lg us vancouver, stay well 😊

---

Photos

Burnaby Mountain
Blick richtig Pazifik

Burnaby Mountain
Blick richtig Inland, das isch de Ozeanarm

English Bay
Im Hintergrund Downtown