Sun, Fun and Bears

---

Und schowider sind drüü Täg verbii,es isch eifach so super cool da. Am fritig simmer a eusem freie Namitag an Beach gange, sünnele und bädele 😉 am abig simmer den s erste mal all mitenand eis go trinke. Zerst simmer imene Mexikaner in Gastown gsi und hend gad auno euse Hunger mit Burritos und Fachitas gstillt und den simmer is Malones, eusi noi Stammbar (aso ja am Beni sini Stammbar vo letschtmal in Vancouver 😊 ). Es isch chli und chilig und d Barkeeperin isch mega lustig. Mer chan au det ässe, es isch eigetli es Pub, bzw es isch au es Cambies (das Pub in Gastown woni scho drüber gschribe ha). Mi händ uf jede fall en super coole namitag-abig gha 😉

Am Samstig simmer den zerst am Robson Square en Street Dance Contest go luege und die Tänzer sind ja soooo abgange. Bim Wacking (e Art vo sexy laszivem Street Dance) het en Junge Tänzer all Ladies in Schatte gstellt, ich ha sälte je e Frau gseh so sexy tanze wie de Dude!!! 😊 Dänn simmer natürli an Beach, sünnele, bädele, Füürwerch luege. D Italiener sind zimlich abgange und mir sind usem stuune nüme use choo (oohhh woooow awesome-dary)! Wos fertig gsi isch simmer mit de ganze Crowd wider zum Malones gloffe aber es isch so warm gsi dases en coole Spaziergang dur Vancouver by Night gsi isch. Im Malones hämmer no es Bettmümpfeli gno und sind den zimli müäd hei gfahre.

Hüt sind di andere ja uf Seattle go shoppe und ich bin mit mine Gasteltere go bike und hike. Mi sind mitm Auto anen Spot gfahre und vo det mitm Velo los düsed. Nach öpe 20min chömmed mir so um d Kurfe trampled und tadaaa zmitzt ufm Wäg en Mama-Bär mit irne zwei süässä Chliinä. Mir händ brav aaghalte und si het echli skeptisch driiglueget (si sich nu öpe 10-15m entfernt gsi). De john het den Pfiffe und nach eme momänt het si beschlosse eus de Wäg frei zmache. Mi sind den zumene Park cho wommer d Velos abgstellt händ und den simmer ufen Hügel ufe gwanderet vo wo mer e suuuper Ussicht uf d Ebeni hät. Ufem Rückwäg mitm Velo simmer den nomal amene Bär begägnet, er isch uf eus zue cho aber es hät en elektro Haag dezwüsche gha und de John hätten miteme Pfiff bizeli verschüücht. Mir sind den langsam und mit möglichst vill Abstand (5m) a ihm verbii gfahre, isch scho mega iidrücklich so en Bär ide Wildniss z gseh!!!

Ez bini komplett kabutt vo dem 4h Trip und freu mi uf min Chickenburger 😊 Morn hämmer ja auno frei und gönd filicht nach MetroTown, e Mall mit üer 400 Läde 😉 also hebed eu sorg und ned z wild! Hugs from Bearland 😉

---

Photos

Me & Lime Refresher
das i minere Hand isch en Lime Refresher vom Starbucks, soooo guet!

Bear ahead!
Oh yes und wie ;)